महाभारतसूक्तयः (जन्म)

शुभैर्लभति देवत्वं व्यमिश्रैर्जन्म मानुषम्।
अशुभैश्चाप्यधो जन्म कर्मभिर्लभतेऽवशः॥ शान्ति.३२९/२५॥

तत्र मृत्युजरादुःखै सततं समभिदुतः।
संसारे पच्यते जन्तुस्तत्कथं नावबुद्ध्यसे॥ शान्ति.३२९/२६॥

वर्जयन्ति च पापानि जन्मप्रभृति ये नराः।
अरोगा रूपवन्तस्ते धनिनश्च भवन्त्युत॥ अनु.१११/१२९॥

तिर्यग्योन्याः शूद्रतामभ्युपैति शूद्रो वैश्यं क्षत्रियत्वं च वैश्यः।
वृत्तश्लाघी क्षत्रियो ब्राह्मणत्वं स्वर्गं पुण्यं ब्राह्मणः साधुवृत्तः॥ अनु.११८/२४॥

ये मृताः सहसा मर्त्या जायन्ते सहसा पुनः।
तेषां पौराणिकोऽभ्यासः कंचित् कालं हि तिष्ठति॥अनु.१४५ दा.पा.अ.IX॥

तस्माज्जातिस्मरा लोके जायन्ते बोधसंयुताः।
तेषां विवर्धतां संज्ञा स्वप्नवत् सा प्रणश्यति॥
परलोकस्य चास्तित्वे मूढानां कारणं त्विदम्॥ अनु.१४५ दा.पा.अ.IX॥